Қазақстан ТМҰ-ның цифрлық серіктестік туралы келісімін ратификациялады
Біртұтас түркі цифрлық кеңістігіне қадам.
Қазақстан Республикасы Сауда және интеграция министрлігі Түркі мемлекеттері ұйымына мүше мемлекеттердің үкіметтері арасындағы цифрлық экономика саласындағы әріптестік туралы келісімге Қазақстан Республикасы Үкіметінің 2024 жылғы 1 қарашадағы № 916 қаулысы негізінде Бішкек қаласында 2024 жылғы 6 қарашада өткен ТМҰ Мемлекет басшылары кеңесінің 11-саммиті шеңберінде қол қойылғанын хабарлайды.
Келісім Түркі мемлекеттері ұйымына мүше мемлекеттер басшыларының Стамбұл (2021 ж.) және Самарқанд (2022 ж.) саммиттерінде айтылған тапсырмаларын орындау мақсатында әзірленген және мүше мемлекеттер арасындағы сауда-экономикалық байланыстарда цифрлық құралдарды дамытуға бағытталған.
Келісімнің негізгі мақсаттары:
— цифрлық экономиканың орнықты, инклюзивті және тұрақты дамуына жәрдемдесу;
— цифрлық технологиялар саласындағы ынтымақтастықты дамыту және цифрлық ортаны реттеудің бірыңғай тәсілдерін белгілеу;
— шағын және орта бизнес субъектілерінің трансшекаралық цифрлық саудаға қатысуын кеңейту;
— тұтынушылардың сенімін нығайту;
— электрондық сауда арқылы сауда қатынастарын нығайту.
Жобаны қабылдау экономикалық белсенділіктің өсуіне, іскерлік байланыстардың кеңеюіне және цифрлық экономиканы реттеудің жаңа ашық стандарттарын әзірлеуге ықпал ететін болады.