Қазақстанда ең жанғыш 24 орман мекемесінде өртті ерте анықтау жүйесі орнатылады
Орман өрттерін уақытылы анықтау және жедел сөндіру мақсатында еліміздің 10 облысында ормандарды авиациялық патрульдеу жүргізіліп жатыр.
15 әуе бөлімшесінде 14 тікұшақ пен 3 ұшақ жұмыс істейді. Ағымдағы жылдың наурыз айында Орман шаруашылығы және жануарлар дүниесі комитетінің аумақтық бөлімшелері мемлекеттік орман иеленушілердің өрт қауіпті маусымға дайындығы бойынша бақылау тексерулерін жүргізді. Мәселен, облыс әкімдіктері мен мемлекеттік орман иелеріне өртті сөндіру үшін күштер мен құралдарды толық жауынгерлік әзірлікке келтіру тапсырылды. Бұл туралы Орталық коммуникациялар қызметінде өткен баспасөз мәслихатында Комитет төрағасының орынбасары Мақсат Елемесов мәлімдеді.
Спикердің айтуынша, биыл материалдық-техникалық жарақтандыру үшін жергілікті бюджеттен 6,3 млрд теңге бөлінген. Бұл қаражатқа 41 өрт сөндіру автоцистернасын, 19 шағын орман патрульдік кешенін, 32 тракторды, 29 бірлік патрульдік автомашинаны сатып алу жоспарда бар. 35 млрд теңге сомасына лизингтік қаражат есебінен 168 өрт сөндіру автоцистернасын, 75 доңғалақты тракторды және 163 шағын орман-патрульдік кешенін сатып алу көзделген. Мемлекеттік орман иелеріне 20 млрд теңге бөлінді. Бұл қаражатқа 186 бірлік өрт сөндіру автоцистерналарын, 247 бірлік доңғалақты тракторларды, 186 бірлік доңғалақты тракторларды, 186 бірлік шағын ағаш патрульдік кешендерді сатып алу жоспарлануда.
«Ерте анықтау шыққан өрттерге жедел ден қоюдың кепілі болып табылады. Сондықтан елде өртті ерте анықтау жүйесі кезең-кезеңімен енгізілуде. Қазіргі уақытта бұл жүйе орман қорының 1 млн 300 мың га аумағын қамтып отыр. Түтіннің таралуын тану функциясы бар 127 камера орнатылған. Ағымдағы жылдың соңына дейін ерте анықтау жүйесі елдегі ең жанғыш 24 орман мекемесінде енгізілетін болады. Бүгінгі таңда „Семей орманы“ резерватында сапалы тексеруден өтетін 37 камера орнатылған. Олар өнеркәсіптік пайдалануға тамыз айында берілмек. Жыл соңына дейін ерте анықтау жүйесін 5,4 млн га алқаптағы орман қорының аумағында орнату жоспарлануда», — деп атап өтті Мақсат Елемесов.
Бұдан бөлек, Стратегиялық жоспарлау және жедел басқару орталығының базасында тәулік бойы ТЖМ, Экология министрлігі, «Қазгидромет» және «Қазақстан ғарыш сапары» бірлесіп, елдегі өрт қауіпті жағдайға мониторинг жүргізіледі. Өрт туралы барлық ақпарат осы орталыққа жіберіледі. Орман өрттері туындаған жағдайда өрттерді модельдеу режимі енгізіледі. Яғни, қызметкерлер өрттің бір сағаттан кейін, екі, үш сағаттан кейін қалай дамитыны туралы ақпарат алады. Бұл күштер мен құралдарды қайта топтастыруға және қызметтерді өрт орындарына қосымша бағыттауға мүмкіндік береді. Спикер өткен жылдың 1 шілдесінен бастап тәуекелдер үшін қосымша ақы шеңберінде орман өрттерін сөндірумен айналысатын қызметкерлердің жалақысы 100%-ға өскенін еске салды. Сондай-ақ орман шаруашылығының 1320 маманы ТЖМ мамандандырылған бөлімшелерінің базасында біліктілікті арттыру курстарынан өтті.