Қазақстандықтар жасанды интеллекттің көмегімен заңгерлік кеңес ала алады
Әділет министрлігі азаматтарға құқықтық кеңес беретін жасанды интеллект элементтері бар чат-ботын әзірледі.
Қазір ол Zan Komegi мобильді қосымшасының негізінде жетілдіріліп, тәжірибелік ортада тестілеуден өткізіліп жатыр. Бұл туралы Орталық коммуникациялар қызметінің брифингінде ҚР әділет вице-министрі Бекболат Молдабеков мәлімдеді. Спикер Zanbar және IPrav қосымшаларында адвокаттар мен заң кеңесшілерінің рейтингі бар екенін түсіндірді, оны E-Zan Komegi қосымшасында бағалайтындардың көп болуына байланысты бағалаудың объективтілігін арттыру үшін пайдалануға болады.
«Жасанды интеллект (AI) заң шығарудың өте маңызды бір бөлігі. Мысалы, біз Қазақстанның университеттерімен — ҚазҰТЗУ, ҚарМУ, ҚазҰУ және басқа да ЖОО-мен жұмыс тобын құрдық. Мысалы, келесі үш жылда Қ. Сәтбаев атындағы университет азаматтарға ЖИ көмегімен кеңес алуға көмектесетін жоба әзірлемек. Әріптестермен меморандум жасасамыз. Әл-Фараби атындағы ҚазҰУ-де жасанды интеллекттің барлық модулін Қазақстанда іске қосу үшін суперкомпьютер бар. Сондай-ақ біз нарықпен, бизнес-ортамен жұмыс істейміз. Бұл — Zanbar, IPrav сияқты мобильді қосымшаларды жасайтын компаниялар», — деді Бекболат Молдабеков.
Оның айтуынша, әзірленіп жатқан жобалардың басты мақсаты — халықтың құқықтық сауаттылығын арттыру.
«Келесі айда ҚазҰТЗУ-мен бірлесіп заң клиникаларын ашамыз. Яғни, бұл азаматтарға арналған ХҚКО деп аталады, бірақ мұнда заңгерлер отырады. Кез келген азамат университетке келіп, кеңес ала алады. Біздің басты міндетіміз — азаматтардың құқықтық қорғалуы. Әрине, бізде сонша адвокат пен заң кеңесшісі жоқ. Ең бастысы, азаматтар сұрақтарға ЖИ және мобильді қосымшалар арқылы жауап алады», — деп түйіндеді әділет вице-министрі.