Alatau City-де KAIST филиалын ашу жобасының техникалық-экономикалық негіздемесі таныстырылды
Техникалық-экономикалық негіздемені әзірлеу жұмысының сәтті аяқталуы Қазақстан мен Корея Республикасының бірлескен бастамасын іске асырудағы маңызды кезең болды.
Астанада Кореяның озық ғылым және технологиялар институтының (KAIST) филиалын Алатау қаласында ашу жөніндегі бірлескен флагмандық жобаның техникалық-экономикалық негіздемесінің ресми таныстырылымы өтті.
Іс-шараға ҚР Ғылым және жоғары білім министрі Саясат Нұрбек, Корея Республикасының ҚР Төтенше және Өкілетті Елшісі, KAIST басшылығы мен сарапшылар тобы, сондай-ақ Alatau City басқарушы компаниясының өкілдері мен инвесторлары қатысты.
Кездесу барысында KAIST командасы QAIST жобасының аяқталған техникалық-экономикалық негіздемесінің нәтижелерін ұсынды. Онда болашақ университеттің тұжырымдамасы мен академиялық моделі, ғылыми зерттеулердің басым бағыттары, факультеттердің құрылымы мен білім беру бағдарламалары, сондай-ақ жобаны іске асырудың экономикалық тиімділігі мен ықтимал тәуекелдеріне берілген бағалау қамтылды. Сонымен қатар қатысушылар зерттеу қорытындыларын талқылап, жобаны іске асырудың алдағы кезеңдерін және оны жүзеге асырудың келесі қадамдарын айқындады.
Техникалық-экономикалық негіздемені әзірлеу жұмысының сәтті аяқталуы Қазақстан мен Корея Республикасының бірлескен бастамасын іске асырудағы маңызды кезең болды. Құжат жобаның академиялық және экономикалық тұрғыдан жоғары өміршеңдігін растап, болашақ ғылыми-білім беру кластерінің негізгі параметрлерін, заманауи кампустың құрылыс кезеңдерін және халықаралық деңгейдегі мамандар даярлау моделін айқындайды.
Оңтүстік Кореяның жетекші технологиялық жоғары оқу орны — KAIST филиалының Alatau City-де ашылуы Қазақстандағы жоғары білім мен ғылымды дамытуға бағытталған стратегиялық жобалардың біріне айналады. Бұл бастама халықаралық ғылыми-технологиялық орталықты қалыптастыруға, озық ғылыми зерттеулерді дамытуға, технологияларды коммерцияландыруға, әлемнің жетекші университеттерімен ынтымақтастықты нығайтуға және Қазақстан мен Орталық Азия елдері үшін жоғары білікті инженерлік кадрлар даярлауға мүмкіндік береді.